ലോകത്തിലെ ഏറ്റവും നല്ല അമ്മ

പൂന്തോട്ടത്തിലെ തന്റെ ജോലിയില്‍ മുഴുകിയിരുന്ന ഗംഗാദാസ് സ്കൂളിലെ പ്യുണ്‍ , തന്നെ പ്രിന്‍സിപ്പല്‍ വിളിക്കുന്ന കാര്യം പറഞ്ഞപ്പോള്‍ അകാരണമായി ഒന്ന് ഭയന്നു..

'പ്രിന്‍സിപ്പല്‍ മാം നിങ്ങളെ വിളിച്ചു ..ഇപ്പോള്‍ തന്നെ ചെല്ലാന്‍ പറഞ്ഞു "

'ഇപ്പോള്‍ തന്നെ ചെല്ലാന്‍ പറഞ്ഞു' എന്നുള്ള വാക്കിലെ ഊന്നല്‍ ആണ് ഗംഗാ ദാസിനെ ഭയപ്പെടുത്തിയത് ..

പ്രിന്‍സിപ്പലിന്റെ മുറിയിലേയ്ക്ക് നടക്കുമ്പോള്‍ ഗംഗാദാസ് വല്ലാതെ ഭയന്നിരുന്നു ..

താന്‍ എന്തെങ്കിലും തെറ്റ് ചെയ്തോ , ആരെങ്കിലും തന്നെക്കുറിച്ച് പരാതി എന്തെങ്കിലും പറഞ്ഞുവോ ..

ഇങ്ങനെ നിരവധി സംശയങ്ങള്‍ മനസ്സില്‍ വന്നതുകൊണ്ട് പ്രിന്‍സിപ്പല്‍ റൂമിലേയ്ക്ക് കടക്കുമ്പോള്‍ ഗംഗാദാസ്‌ നന്നായി വിയര്‍ത്ത് കഴിഞ്ഞിരുന്നു ..

ഗംഗാദാസ്‌ വന്നയുടന്‍ തന്നെ പ്രിന്‍സിപ്പല്‍ മേശപ്പുറത്ത് ഇരിക്കുന്ന ഒരു പേപ്പര്‍ ഗംഗാദാസിനെ കാണിച്ചു ..

' ഗംഗാദാസ് ആ പേപ്പര്‍ എടുത്ത് വായിക്കു ..'

ഇംഗ്ലീഷില്‍ എഴുതിയിരിക്കുന്ന പേപ്പര്‍ കണ്ടതും

' മാം , എനിക്ക് ഇംഗ്ലീഷ് വായിക്കാന്‍ അറിയില്ല ..മാം എന്നോട് ക്ഷമിക്കണം ..അറിവില്ലാതെ എന്തെങ്കിലും തെറ്റ് ചെയ്തിട്ടുണ്ടെങ്കില്‍ ദയവായി എന്നോട് പൊറുക്കണം ..എന്നെയും എന്റെ മകളെയും ഇവിടെ നിന്ന് പുറത്താക്കരുത്‌ ..'

ഗംഗാദാസിന്റെ സങ്കടവും വിഷമവും കണ്ടപ്പോള്‍

' ഏയ്‌ , ഗംഗാ ദാസ്‌ അങ്ങനെ ഒന്നും ഇല്ല ..ഇത് നിങ്ങളുടെ മകള്‍ എഴുതിയതാണ്..അത് എന്താണ് എന്ന് ഗംഗാദാസ്‌ അറിയണം എന്ന് കരുതിയാണ് വായിക്കാന്‍ പറഞ്ഞത് '

' മാം , അവള്‍ പാവമാണ് ..അവള്‍ എന്തെങ്കിലും അവിവേകം എഴുതിയെങ്കില്‍ , ദയമായി അവളോട്‌ ക്ഷമിക്കണം ..ഞാന്‍ അവളെ പറഞ്ഞു ശരിയാക്കാം ..'

' ഗംഗാദാസ്‌ അങ്ങനെ അല്ല , നിങ്ങള്‍ ഈ കത്ത് വായിച്ച് കേള്‍ക്കണം ..ഞാന്‍ അവളുടെ ടീച്ചറെ വിളിപ്പിക്കാം '

മകള്‍ എന്താണ് എഴുതിയത് എന്നറിയാതെ വിഷമിച്ചു നില്‍ക്കുന്ന ഗംഗാദാസിന്റെ അടുത്തേയ്ക്ക് മകളുടെ ക്ലാസ് ടീച്ചര്‍ എത്തി ..

' ഗംഗാദാസ്‌ , ഇന്നലെ 'മദേര്‍സ് ഡേ ' ആയിരുന്നു ..അമ്മമാരേ ഓര്‍മിക്കുന്ന ദിവസം ..ആ ദിവസത്തെ കുറിച്ച് ഒരു കുറിപ്പ് എഴുതുവാന്‍ ഞാന്‍ എല്ലാ കുട്ടികളോടും പറഞ്ഞു ..

നിങ്ങളുടെ മകള്‍ , രേണു ദാസ്‌ എഴുതിയ കത്താണ് ഇത് ..ഇംഗ്ലീഷിലാണ് എഴുത്ത് ..നിങ്ങള്‍ക്ക് വേണ്ടി ഞാന്‍ കത്ത് വായിക്കാം ..അര്‍ത്ഥം ഹിന്ദിയില്‍ പറഞ്ഞു തരാം..'

തുടര്‍ന്ന്‍ ടീച്ചര്‍ ഇംഗ്ലീഷ് ഭാഷയില്‍ കത്ത് വായിക്കുകയും അതിന്റെ തര്‍ജ്ജിമ ഹിന്ദിയില്‍ നടത്തുകയും ചെയ്തു ..

കത്ത് ഇങ്ങനെയാണ്

"ഇന്ന് ഞങ്ങളോട് 'മദേര്‍സ് ഡേ ' യെ കുറിച്ച് എഴുതുവാന്‍ ടീച്ചര്‍ പറഞ്ഞു ..

ബീഹാറിലെ ഏറ്റവും ദാരിദ്രം നിറഞ്ഞ ഒരു കുഗ്രാമമാണ് എന്റെ ജന്മസ്ഥലം ..

ആശുപത്രികള്‍ ഒന്നും ഇല്ലാത്ത സ്ഥലം ..

സ്കൂളുകളും ഇല്ല ..

പ്രസവത്തില്‍ തന്നെ കുട്ടികളും അമ്മമാരും മരിക്കുന്നത് അവിടെ സാധാരണമാണ് ..

എന്റെ അമ്മയും പ്രസവത്തില്‍ തന്നെ മരിച്ചു..

അമ്മയ്ക്ക് എന്നെ ഒന്ന് കാണുവാനോ എടുക്കുവാനോ കഴിഞ്ഞില്ല ..

എന്നെ നഴ്സിന്റെ കൈയ്യില്‍ നിന്നും എടുത്തത് എന്റെ അച്ഛന്‍ ആണ്.

ഞാന്‍ ജനിച്ചപ്പോള്‍ തന്നെ അമ്മയുടെ കാലന്‍ ആയി എന്നാണ് അച്ഛന്റെ വീട്ടുകാര്‍ പറഞ്ഞത് ..

അതുകൊണ്ടുതന്നെ അച്ഛന്‍ അല്ലാതെ ഒരാളും എന്നെ ഒരിക്കല്‍ പോലും എടുത്തിട്ടില്ല..

എന്നെ കുളിപ്പിച്ചതും എന്റെ കാര്യങ്ങള്‍ നോക്കിയതും എല്ലാം എന്റെ അച്ഛനാണ് ..

അച്ഛനെ വീണ്ടും വിവാഹം കഴിപ്പിക്കാന്‍ എല്ലാവരും ശ്രമിച്ചു ..

അച്ഛന്‍ വിസമ്മതിച്ചു ..

ധാരാളം പശുക്കളും കുറെ വയലുകളും അച്ഛന് ഉണ്ടായിരുന്നു ..

വിവാഹം കഴിച്ചില്ലെങ്കില്‍ സ്വത്തുക്കള്‍ കൊടുക്കില്ല എന്നും എല്ലാവരും അച്ഛനോട് പറഞ്ഞു ..

6 മാസം പ്രായമുള്ള എന്നെ മാത്രം എടുത്ത് , എല്ലാ സ്വത്തുക്കളും ഉപേക്ഷിച്ച് അച്ഛന്‍ അങ്ങനെയാണ് ഈ നഗരത്തില്‍ എത്തുന്നത്‌ ..

എന്നെ വളര്‍ത്താന്‍ അച്ഛന്‍ എല്ലാ ജോലിയും ചെയ്തു ..

അച്ഛന് അധികം വിദ്യാഭ്യാസം ഇല്ലാത്തതിനാല്‍ നല്ല ജോലികള്‍ ഒന്നും കിട്ടിയില്ല ..

അങ്ങനെ വിവിധ ജോലികള്‍ ചെയ്യുമ്പോഴാണ് അച്ഛന്‍ ഈ സ്കൂളിലെ തോട്ടക്കാരന്‍ ആകുന്നത് ..

അച്ഛന്‍ പലപ്പോഴും പല ഭക്ഷണ സാധനങ്ങളും എനിക്ക് നല്‍കുമ്പോള്‍ , അച്ഛന് അവ ഇഷ്ടമില്ല എന്ന് പറഞ്ഞിരുന്നതിന്റെ അര്‍ഥം ഇപ്പോള്‍ എനിക്ക് മനസ്സിലാകുന്നുണ്ട് ..

കാരണം അവ ഒന്നോ രണ്ടോ മാത്രമേ ഉണ്ടായിരുന്നുള്ളു ..

ഞാന്‍ ഭക്ഷണം കഴിക്കുമ്പോള്‍ സന്തോഷത്തോടെ എന്നെ നോക്കിയിരിക്കുന്ന അച്ഛനെ ഞാന്‍ ഓര്‍ക്കാറുണ്ട് ..

ത്യാഗമാണ് ഒരു അമ്മയുടെ മുഖമുദ്ര എങ്കില്‍ എന്റെ അമ്മ എന്ന് പറയാവുന്നത് എന്റെ അച്ഛനെയാണ് ..

വാത്സല്യമാണ് അമ്മ എങ്കില്‍ , എന്റെ അമ്മ എന്റെ അച്ഛന്‍ തന്നെയാണ് ..

കാരുണ്യമാണ് അമ്മയെങ്കില്‍ എന്റെ അച്ചനാണ് എന്റെ അമ്മ ..

ഈ മദേര്‍സ് ഡേയില്‍ എന്റെ അച്ഛന് എല്ലാവിധ ആശംസകളും അര്‍പ്പിക്കാന്‍ ഞാന്‍ ആഗ്രഹിക്കുന്നു , കാരണം ലോകത്തിലെ ഏറ്റവും നല്ല അമ്മ എന്റെ അച്ഛന്‍ തന്നെയാണ് ..

ഈ സ്കൂളിലെ കഠിന അദ്വാനിയായ തോട്ടക്കാരന്‍ എന്റെ അച്ഛനാണെന്ന് പറയുന്നതില്‍ ഞാന്‍ അഭിമാനിക്കുന്നു ..

ഇങ്ങനെയുള്ള ഒരു അച്ഛന്റെ മകളായി ജനിച്ചത്‌ എന്റെ മുന്‍ജന്മ പുണ്യമായി ഞാന്‍ കരുതുന്നു ..

ഈ കത്ത് ഇങ്ങനെ എഴുതിയിത് കൊണ്ട് , പരീക്ഷയില്‍ ഞാന്‍ തോല്‍ക്കും എന്ന് എനിക്ക് അറിയാം ..

എന്നാലും ഈ ദിവസം എന്റെ അച്ഛന്റെ നിസ്വാര്‍ഥമായ സ്നേഹത്തിന്റെ ഓര്‍മയ്ക്ക് മുന്നില്‍ ഞാന്‍ സമര്‍പ്പിക്കുന്നു "

കത്ത് വായിച്ച് കഴിഞ്ഞപ്പോള്‍ ഓഫീസില്‍ തികഞ്ഞ നിശബ്ദത

ഗംഗാദാസിന്റെ അടക്കിപിടിച്ച തേങ്ങലുകള്‍ മാത്രം കേള്‍ക്കാം ..

നിറ കണ്ണുകളോടെ ഗംഗാദാസ്‌ ടീച്ചറിന്റെ കൈയ്യില്‍ നിന്നും ആ കത്ത് വാങ്ങി ..

സാവധാനം ആ കത്ത് തന്റെ നെഞ്ചോടുചേര്‍ത്തു..

മകളുടെ ജീവന്‍ ആ കത്തില്‍ ഉണ്ടെന്ന് തോന്നുന്ന രീതിയില്‍ ഗംഗാദാസ്‌ കണ്ണുകള്‍ അടച്ചു പിടിച്ചു ..

പ്രിന്‍സിപ്പല്‍ സാവധാനം ഗംഗാദാസിനെ തോളില്‍ കൈവെച്ചു ..

സാവധാനം ഗംഗാദാസിനെ കസേരയില്‍ ഇരുത്തി ..

' ഈ വെള്ളം കുടിക്കു..ഗംഗാ ..'

" ഗംഗാദാസ്‌ , നിങ്ങളുടെ മകള്‍ക്ക് ഈ കത്തിന് പത്ത് മാര്‍ക്കും ലഭിച്ചു ..മുഴുവന്‍ മാര്‍ക്കും നേടിയ ഏക കുട്ടിയാണ് രേണു ..

ഈ സ്കൂളിന്റെ ചരിത്രത്തില്‍ മദേര്‍സ് ഡേ ' കുറിച്ച് എഴുതപ്പെട്ടിട്ടുള്ള ഏറ്റവും നല്ല കത്താണിത്..

എന്റെ അധ്യാപക ജീവിതത്തിലെയും ഏറ്റവും നല്ല മൂഹുര്‍ത്തം കൂടിയാണിത് ..

നാളെ ഈ സ്കൂളില്‍ മദേര്‍സ് ഡേ ' യുടെ ആഘോഷം നടക്കുകയാണ് ..

ഞങ്ങള്‍ അധ്യാപകരും മാനേജ് മെന്റും ഒരു തീരുമാനം എടുത്തു ..

നാളത്തെ ചടങ്ങിലെ വിശിഷ്ട അതിഥി ഗംഗാദാസ്‌ ആണ് .

സ്വന്തം കുട്ടിയെ വളര്‍ത്തുവാന്‍ ഒരു അച്ഛന്‍ സഹിച്ച എല്ലാ ത്യാഗത്തിന്റെയും പരിണിത ഫലമാണ് രേണുദാസ്‌ ..

രേണുദാസ്‌ ഈ സ്കൂളിന്റെ അഭിമാനമായ മിടുക്കിയാണ് .

ആ മിടുക്കിയെ വളര്‍ത്തിയ താങ്കള്‍ തന്നെയാണ് നാളത്തെ അതിഥി ..

താങ്കള്‍ തന്നെയാണ് ഈ ലോകത്തിലെ ഏറ്റവും നല്ല അമ്മ ..'"
....................................................
ഒരു യഥാര്‍ത്ഥ സംഭവത്തിന്റെ രേഖാചിത്രം ..

കുടുംബങ്ങളിൽ എങ്ങിനെ ഗുണ്ടകളെ സൃഷ്ടിയ്ക്കാം ?

കഴിഞ്ഞദിവസം ഒരുവീട്ടില്‍ ചെന്നപ്പോള്‍ നിക്കറുപോലും ഇടാത്ത ഒരു ചെറിയകുട്ടി മേശപ്പുറത്തു കയറിനിന്ന് അപ്പാപ്പനെ പച്ചത്തെറി വിളിയ്ക്കുന്നു...

എന്നെക്കണ്ടപ്പോള്‍ ജാള്യതയോടെ അവന്റെയമ്മ പറഞ്ഞു: "അവനിങ്ങനാ ചേട്ടാ, ദേഷ്യംവന്നാല്‍ അപ്പാപ്പനെ തെറി വിളിയ്ക്കും. എന്നാ ചെയ്യാനാ.. ഈ ചെറുക്കനെക്കൊണ്ടു തോറ്റു."

ഞാനവനെനോക്കി ചെറുതായൊന്നു നാക്കു കടിച്ചതും അവന്റെയമ്മ പറഞ്ഞതും ഒന്നിച്ച്: ''ദേ ഈ മാമന്‍ പോലീസാ... ഇങ്ങനെ പറഞ്ഞാല്‍ കുഞ്ഞിനെ പിടിച്ചോണ്ടുപോകും''

അതോടെ ചെക്കന്‍ അടങ്ങി.
തളളയുടെ സന്തോഷം കളഞ്ഞ് എന്റെ കുരുത്തംകെട്ട നാക്ക് ചോദിച്ചു '' ഇത്തിരിപ്പോന്ന ഇവനെ നിങ്ങള്‍ക്ക് ഇപ്പോള്‍ കൺട്രോൾചെയ്യാന്‍ പറ്റീല്ലേല്‍ ഇനി എപ്പോള്‍ അതു നടക്കും?''

ഈ ചോദ്യം മിക്കവാറും രക്ഷകര്‍ത്താക്കളോടും ചോദിക്കേണ്ട ഒന്നാണ്. കൊച്ചുകുട്ടികളുടെ വികൃതി, കാണുന്നവര്‍ക്കു മുഴുവന്‍ അരോചകമായാലും പല വീട്ടുകാരും കല്ലിനു കാറ്റുപിടിച്ചപോലെ അനങ്ങാതിരിക്കും. ഒരു വാക്കു കൊണ്ടുപോലും തടയില്ല.
കുട്ടികള്‍ ശല്ല്യമുണ്ടാക്കാതിരിക്കാന്‍ കുറേ ന്യൂഡില്‍സുംപുഴുങ്ങി കോഴിക്കറിയുമായി ടി.വി.യുടേയോ കമ്പ്യൂട്ടറിന്റെയോ മുന്നില്‍ കൊണ്ടിരുത്തും.

അവനവിടിരുന്ന് അതിമാനുഷ്യരായ കാര്‍ട്ടൂണ്‍ കഥാപാത്രങ്ങളെക്കണ്ട് അവരെപ അനുകരിക്കും.

വാശിപിടിച്ച് അവരുടെ വേഷംധരിച്ചു നടക്കും. മൊബൈൽ ഫോണിലോ കമ്പ്യൂട്ടറിലോ ഉളള ഗെയിമിലൂടെ ബാങ്ക് റോബറിയും മോട്ടോർറെയ്സും കളിക്കും.

അതിലൂടെ തനിക്കു ജയിയ്ക്കണമെങ്കില്‍ മറ്റുളളവരെ കൊല്ലുകയോ നശിപ്പിക്കുകയോ വേണമെന്നു പഠിക്കും. കൂടുതല്‍ വേഗം കൂടുതലാളെ കൊല്ലുന്നവനാണു വിജയി എന്നു തെറ്റിദ്ധരിയ്ക്കുന്നു.

കഥ പറയാനും ഉപദേശിയ്ക്കാനും വീട്ടില്‍ കാര്‍ന്നോന്മാരില്ല... ഉണ്ടങ്കില്‍ ''കൺട്രീസ്, ആ ഓൾഡ് ഫെലോ" യോടു സംസാരിക്കേണ്ടന്ന് അമ്മ വിലക്കും. പകരം TV യിലെ കാല്‍ക്കാശിനു വിലയില്ലാത്ത തറ സീരിയല്‍ കാണാനിരുത്തും.

അതിലൂടെ കല്ല്യാണം കഴിഞ്ഞാല്‍ പെണ്‍കുട്ടി ആദ്യംചെയ്യേണ്ട കര്‍മ്മം അമ്മായിയമ്മ എന്ന സത്വത്തെ അടിച്ചമര്‍ത്തണം എന്നും നാത്തൂനെ വീട്ടിലെന്നല്ല വാര്‍ഡില്‍പ്പോലും കേറ്റിക്കൂടെന്നും.
ആണ്‍കുട്ടിയാണേല്‍ ഒന്നുകില്‍ കുറഞ്ഞതു 3-4 പെണ്ണുങ്ങളെയെങ്കിലും വളയ്ക്കാന്‍ പറ്റണം... അല്ലങ്കില്‍ തനി മണുക്കൂസനാവണമെന്നും പഠിക്കും.

നിയമാനുസരണം രക്ഷാകര്‍ത്താക്കള്‍ കുട്ടിയെ തല്ലിക്കൂട. സ്കൂളിലെ മാഷുന്മാർ നോക്കാനേ പാടില്ല.. പരീക്ഷയെഴുതുന്ന എല്ലാവരും ജയിക്കും. അക്ഷരംപോലും അറിയണമെന്നില്ല. എങ്കിലും ഒരു ത്രില്ലിനു കോപ്പിയടിയ്ക്കും. പിടിയ്ക്കപ്പെടില്ല. ഇനി പിടിച്ചാല്‍ പിടിച്ച സാറിന്റെ പണി പോകും... ഇല്ലങ്കില്‍ ചാനലിലെ മാമന്മാരും ആന്റിമാരുംകൂടി കളയിച്ചുതരും. പോലീസ് പിടിച്ചാലും തല്ലിക്കൂടാ... തല്ലണമെന്നില്ല നോക്കിയാലും അവരുടെ പണി കളയാം... അതിനു വേറേ ചില മാമന്മാരും സഹായിക്കും.

മുട്ടേന്ന് വിരിയുംമുമ്പേ കുട്ടിയെ ടൂവീലർ ഓടിക്കാന്‍ പഠിപ്പിക്കും. കളിക്കാന്‍ മൊബൈൽഫോൺ കൊടുക്കും, എന്നിട്ടു മകന്റെ മിടുക്കുപറഞ്ഞു നാട്ടുകാരുടെമുമ്പില്‍ ഞെളിയും. പത്താംതരം കഴിഞ്ഞാല്‍ ഉടനേ ചെക്കന്‍ DUKE ന്റെ bikeനു വാശി പിടിക്കും. വീട്ടുകാര്‍ക്കു ഗതിയില്ലേലും വണ്ടിവേണമെന്നു ''കുഞ്ഞിന്'' വാശി. സമ്മതിച്ചില്ലേല്‍ ചാകുമെന്ന് ഭീഷണി. പെട്രോൾവാങ്ങാന്‍ കാശിനു കഞ്ചാവിന്റെ ബിസിനസ്സ്, അല്ലങ്കില്‍ കൈത്തൊഴിലായി മാല പൊട്ടിക്കാം. എല്ലാം കഴിഞ്ഞു പറന്നുപോകുമ്പോള്‍ ഒരാകസിഡന്റ്...... ശല്യം തീര്‍ന്നു. പലവീട്ടുകാരും വെക്കേഷനാകുമ്പോള്‍ പറയുന്നതാ ''ഹോ... ഇനി സ്കൂളുതുറക്കുംവരെ ഈ ശല്യം സഹിക്കണമല്ലോ''ന്ന്

നാട്ടിലെ ഫ്രീക്കന്മാരും അവരുടെ ഫ്രണ്ടന്മാരും തകര്‍ത്തു തിമര്‍ക്കുകയാണ്. ഇതിനൊക്കെ എരീം പുളീം കൂട്ടാന്‍ സിന്മേലെ നായകന്മാരും... കടിച്ചാപ്പൊട്ടാത്ത dialogue ഉം full time വെളളവുംഅടിച്ചു കഞ്ചനുംപുകച്ച്, 100 ആനയുടെ(ചിലര്‍ക്ക് 100 JCB യുടെ) കരുത്തുമുള്ള നായകന്‍ പോലീസിനെ യോ രാഷ്ടീയക്കാരനേയോ പേടിയില്ല... അവരെ തല്ലും, തെറിവിളിക്കും. വേണ്ടിവന്നാല്‍ തന്തയ്ക്കും വിളിയ്ക്കും. ഇതുകണ്ട് ആവേശം മൂത്ത ഫാന്‍സ് യൂത്തന്മാര്‍ ഇഷ്ട താരത്തിന്റെ ചിത്രം വന്ന പെട്ടിയുമായി ആനപ്പുറത്ത് ആദ്യ ഷോ കാണാന്‍ വരും. താരത്തിന്റെ ഫ്ളക്സില്‍ പാലഭിഷേകം നടത്തും. അങ്ങനെ ചെയ്യുമ്പോള്‍ താഴെവീണ് ചത്തവന്റെ വീട്ടിലെ പട്ടിണിമാറ്റാന്‍ ഇഷ്ടതാരം ഒരു രൂപപോലും കൊടുത്തില്ലേലും വിഷമം തോന്നാതെ അദ്ധ്വാനിയ്ക്കുന്ന തമിഴനേയും ബംഗാളിയേയും മണ്ടനെന്നു വിളിയ്ക്കും.

ആരും നിയന്ത്രിക്കാനില്ല... നിയന്ത്രിക്കുന്നത് ഇഷ്ടവുമല്ല. സാമുഹ്യമര്യാദ തീരെയില്ല. എന്തു പരിപാടിനടന്നാലും അവിടെല്ലാം അലങ്കോലമുണ്ടാക്കുവാന്‍ കുറേ അലവലാതികള്‍ വരും. കുളിയ്ക്കാതെ മുടി നീട്ടിവളര്‍ത്തി ലോവേസ്റ്റ് പാന്‍സുമിട്ട് bike ഇരമ്പിച്ച് നടക്കുന്ന കുറേയെണ്ണം.
ആളെക്കൊന്നിട്ടായാലും പ്രക്യതി നശിപ്പിച്ചിട്ടായാലും കൂടുംബം കുളംതോണ്ടിയാലും സ്വന്തം കാര്യം നടക്കണം എന്ന രീതിയില്‍ മലയാളിയെ മാറ്റിയതാരാണ്...???

2030 ല്‍ ഭാരതം ലോകത്തിലെ ഏറ്റവും വലിയ ശക്തിയാകാന്‍ കുതിക്കുമ്പോള്‍ മലയാളി യുവത്വം എല്ലാ മേഖലയിലും പിന്നോട്ടുപോകുന്നു. പുരാതന ഭാരതത്തിന്റെ വിദ്യാഭ്യാസ സാംസ്ക്കാരിക കേന്ദ്രങ്ങളായ പാടലീപുത്രയും നളന്ദയും സ്ഥിതിചെയ്ത ബീഹാറിന്റെ ഇന്നത്തെ അവസ്ഥയാവും നാളെ കേരളത്തിനും.

കുടുംബങ്ങളിൽ ചങ്ക്, മുത്ത്, ബ്രോസിനെ വളര്‍ത്തി നമ്മളീ നാടിനെ ഗുണ്ടകളുടെ സ്വന്തം നാടാക്കും.....